श्री गणरायाच्या आशीर्वादाने सुरुवात करून,‘मृद्गंध’ चा हा दिवाळी-नववर्ष विशेषांक आपल्या सारख्या सर्व रसिक वाचकांसमोर सादर करताना, ‘मृद्गंध’ च्या सर्व team ला अत्यंत आनंद होत आहे. अडेलैडे मराठी मंडळ गेली कित्येक वर्षे मराठी संस्कृतीचा वारसा जपण्याचा आणि तो पुढे चालवण्याचा प्रयत्न करीत आहे.
शेवटी संस्कृती म्हणजे तरी काय?
शेवटी संस्कृती म्हणजे बाजरीची भाकरी आणि वांग्याचे भरीत …
गणपती बाप्पा मोरयाची मुक्त आरोळी…
केळीच्या पानातली भाताची मूद आणि त्यावरचे वरण. …
उघड्या पायांनी तुडवलेला पंचगंगेचा काठ…
मारुतीच्या देवळात एका दमात फोडलेल्या नारळातले उडालेले पाणी…
दुस-याचा पाय चुकून लागल्यावर देखील आपण प्रथम केलेला नमस्कार…
दिव्या दिव्या दिपत्कार…
आजीने सांगितलेल्या भुताच्या गोष्टी…
मारुतीची न जळणारी आणि वाटेल तेंव्हा लहानमोठी होणारी शेपटी…
दस-याला वाटायची आपट्याची पाने…
पंढरपुरचे धुळ आणि अबीर यांच्या समप्रमाणात मिसळून खाल्लेले डाळे आणि साखरफ़ुटाणे…..
सिंहगडावर भरुन आलेली छाती आणि दिवंगत आप्तांच्या मुठभर अस्थींचा गंगार्पणाच्या वेळी झालेला स्पर्श…..
कुंभाराच्या चाकावर फिरणा-या गोळ्याला, त्याचे पाण्याने भिजलेले नाजूक हात लागून घाटदार मडके घडावे तसा हया अदृश्य, पण भावनेने भिजलेल्या हातांनी हा पिंड घडत असतो.
कुणाला देशी मडक्याचा आकार येतो. कुणाला विदेशी कपबशीचा…
संस्कृती अशीच आपल्या रोजच्या जीवनाचा भाग असते आणि हा वसा आपल्या माय मराठी मातीचा आपण पुढच्या पिढीला द्यायचा..तोच आपल्या मनात दरवळणारा ओल्या मातीचा सुगंध म्हणजे हा मृद्गंध’ चा अंक!
मंडळाचं एखादं वार्तापत्र काढावं, एक साहित्याचं व्यासपीठ असावं असं खूप दिवसापासून मनात होतं. त्या मूळ कल्पनेला दिवाळीच्या निमित्तानं नवे अंकुर फुटले. अडेलैडे मराठी मंडळ पाठीशी उभं राहिलं. आणि बघता बघता लेख, कविता जमू लागल्या. सौ नम्रता आणि श्री पराग विश्वासराव यांनी design आणि मांडणी करण्याची जवाबदारी घेतली. मराठी typing चा मोठा प्रश्न होता. पण श्री आनंद काळे यांनी मोलाचं सहकार्य केलं. वेगवेगळे विभाग केले.या अंकात प्रत्येकासाठी काहीतरी असावं असा प्रयत्न केला आहे. मराठी typing मधील अडचणी जाणून, आणि जास्तीतजास्त वाचकांपर्यंत पोहचता यावे म्हणून English व मराठी दोन्ही लेखांचा समावेश केला आहे.ललित लेख, कविता या बरोबरच आरोग्यवार्ता, kids corner, recipes सुद्धा आहेत.
श्री दिलीप प्रभावळकर यांची मुलाखत प्रकाशित करता येणं हे आमचं भाग्यच! हा तसा पहिलाच अंक! त्यामुळे शुद्धलेखनाचे काही नियम बाजूला ठेवून सगळ्यांपर्यंत भावना पाहोचाव्या असा प्रयत्न केला आहे. तरी वाचकांनी मोठ्या मनाने त्या पोटात घालाव्या हि विनंती. या एका विशेषांकावर न थांबता दर ३-४ महिन्यांनी एक अंक काढावा असा विचार आहे. अर्थात तुमच्या सहकार्याशिवाय आणि आशीर्वादाशिवाय काहीच शक्य नाही.
हा अंक आपल्याला कसा वाटला, काय आवडलं,काय नाही आवडलं ते आम्हाला email अथवा facebook द्वारे जरूर कळवा.या निमित्ताने आपण एक नवीन उपक्रम सुरु करत आहोत. भाषा, प्रदेश, व्यवसाय याच्या सर्व सीमारेषा पुसून अधिकाधिक लोकांपर्यंत आपली संस्कृती, आपली भाषा आणि प्रेम पोहोचावं हीच इच्छा!
डॉ. सौ प्रीतम गानू
Mrudagandha edition May 2013 Mrudagandha edition Jan 2013 Mrudagandha Diwali 2013 edition
